《勾佬》陳心遙
刊登於2014年10月22日《信報》副刊《視線所及》專欄
在一個燈火昏暗的祠堂中，小新抱正面對全家上上下下的責難，理由是什麼不重要了，就當是小新抱做家務做到嘔之餘，想爭取出去大宅對面涼亭乘涼的權利吧。
首先發言的是大老爺：「呢件事係小新抱所屬長房嘅內部事務，就由長房一家自行解決啦！不過講明先，女眷外出，係唔符合本族嘅傳統。你嘅要求我已經作出最終裁決，就係特別恩准你行出內花園打個轉。你應該感恩戴德，其他家嫂一天黑就返房㗎喇！」
小新抱深深不忿，低着頭語帶顫抖地說：「條村家家戶戶嘅女人都俾出去，更何況呢個係答應嫁入你哋門嘅時候，你親口同我爹娘許下嘅承諾……」
大老爺聽罷頓時火冒三丈：「嫁入我門就係我嘅人，不容許你外家說三道四！」
長房當家續說：「小新抱，你知唔知你的行為好唔和平，已嚴重引起我哋屋企分化。」
小家嫂聽罷環顧四周看見一眾女眷，一張張蒼白的面孔，竊竊私語，突然有個貌似粵片李香琴的家嫂說：「小新抱，我哋已經再三講冇呢個規矩，你仲堅持己見，挑戰大老爺，唔通……」
這番言論即時引起全家起哄，人人目露兇光，即時幾十隻手指向着小新抱：
「係喎，我成日見到鐵欄外面有個男人鬼鬼祟祟偷望入嚟，一定識得小新抱。」
「係啦，唔怪之得小新抱成日話出面條村啲習慣係點點點點，分明手指拗出唔拗入！」
「仲有呀，小新抱最近用緊iPhone 6 Plus呀，一定係嗰個男人偷偷哋送畀佢，愛嚟約時間夜晚幽會用嘅……」
冇錯嘞，對於一個「一入豪門深似海」的女人來說：最大的指控莫過於「偷漢」即係「勾佬」，因為一聽到有人勾佬，全家上上下下為保持家族血統的純粹，就會即刻團結一致，總動員聲討紅杏出牆嘅犯婦人，即使係當眾用棍打、用煙熏，甚至拉佢入暗角拳打腳踢都係罪有應得，如果這樣都不能令婦人貼貼服服，一旦大老爺發火，就唔係打兩拳咁簡單喇。
長房當家再開口：「有證據顯示，今次小新抱明顯係受出面嘅人唆擺，我希望你收聲，等我哋全屋嘅女人盡快可以回到掃地煮飯洗廁所然後返房上床等老公嘅正常生活入面。」
小新抱口中念念有詞：「我勾佬？你哋班男人有邊個唔係晚晚喺出面花天酒地？」
此時一眾兇神惡煞的家丁已拿着長棒把小新抱團團圍住了……
Search